Exo 35:30-36:1 | CebAPD | STEP | Miingon si Moises sa mga Israelinhon, “Paminaw! Gipili sa Ginoo si Bezalel, nga anak ni Uri ug apo ni Hur, nga gikan sa tribo ni Juda.

Exodus 35:30-35

Ang mga Trabahante sa Tolda nga Simbahan

(Exo. 31:1-11)

30 Miingon si Moises sa mga Israelinhon, “Paminaw! Gipili sa Ginoo si Bezalel, nga anak ni Uri ug apo ni Hur, nga gikan sa tribo ni Juda. 31 Gigamhan niya kini sa iyang Espiritu ug gihatagag kaalam ug abilidad sa pagbuhat ug bisan unsang buluhaton— 32 sa paghimog matahom nga mga butang nga hinimo gikan sa bulawan, plata, ug bronsi; 33 sa pagkorti sa mahalong mga bato aron himuong bato sa mga alahas; sa pagkulit sa mga kahoy; ug sa tanang inantigo nga mga buluhaton. 34 Gihatagan usab sa Ginoo si Bezalel, ug si Oholiab nga anak ni Ahisamac nga gikan sa tribo ni Dan, sa abilidad sa pagtudlo sa uban sa ilang nahibaloan. 35 Gihatagan sila sa Ginoo ug kahanas sa paghimo sa tanang klase sa buluhaton: sa pagdesenyo, sa paghabol ug panapton, ug sa pagborda sa linen ug delana nga kolor ube, asul, ug pula. Makahimo sila sa paghimo sa bisan unsang klase sa buluhaton, ug hanas gayod sila niini.”

Exodus 36:1

1 “Si Bezalel, si Oholiab, ug ang uban pang gihatagan sa Ginoo ug kaalam ug abilidad sa nagkalain-laing buluhaton mao ang motrabaho sa Tolda sumala sa sugo sa Ginoo.”